هيجي اليوم / بقلم # صدى العمر

هيجي اليوم
تكون موجود
و أكون راحل
أكون مفقود
لكن مبسوط
برحلة جيرانها ناس صادقة
برحلة جيرانها ناس ساكتة
تعبنا كلام
تعبنا ظلام
تعبنا نداوى بدموعنا
جراح جوة القلوب ساكنة
تعبنا نفاق
تعبت أشتاق
لناس مشتاقة لبعدنا
لناس فرحتها فى وجعنا
تعبنا وشوش بتتحول
تعبت أبدأ من الاول
تعبنا خداع
زهقت أتباع
تعبنا الغربة و رجعنا
رجعنا لأرضنا ضعنا
تعبنا آهات
تعبنا سكات
تعبنا الضرب فى القسمة
تعبنا الخدعة بالبسمة
تعبنا الصبر
شربنا المر
شربنا كاسات عسل مسموم
نداوى جرحنا آخر اليوم
و نبدأ يوم جديد تانى
ألاقى الفرحة نسيانى
تعبنا عشم
فى ناس تاخد و مبتديش
فى ناس كارهة فى أنى أعيش
تعبت أبكى
تعبت أحكى
تعبت آشكى لناس تانين
يجابوا بجرح بعد يومين
تعبت أسمع
وأقول فاهم
لناس مش فاهمة و بتفتى
لناس أقصدها تخبى
أقول ماشى و أنا مالى
آمل سكاتى و غباوتى
تعبت ألآمر الناهى
يقوم يؤمر
أقول حاضر
و أنا الحاضر
أنا الغايب
أنا الصابر
أنا الشاطر
لكن خايب
تعبنا أحلام
تعبنا أوهام
تعبنا السوف و اليمكن
و ضاع الحلم فى الممكن
نقول للفرح لو أمكن
يدق ابوبنا لو غلطة
يخط فى صفحتى نقطة
و أكون شاكر
و هعمل نغسى مش فاكر
حاجات تانية
و هعيش اللحظة للأخر
هعيش الفرح لو ثانية
تعبت أبكى
و أقول عدي
عشان تمشى الحياة بينا
تعبت أجرى
و أقول هدي
لناس مش لاحقة خطوينا
تعبت أصرخ
و الحق صرختى بصمتى
عشان نوصل لمراسينا
تعبنا الكل
كرهنا الذل
تعبنا نعيش لناس تانية
تعبت أبقى فى دور الضل
تعبت خلاص
و نفسى أرتاح
فبدعى يوماتى أكون راحل
و بدعى يوماتى أكون مرحوم
عشان يمكن أكون مرتاح
عشان يمكن الاقى براح
وأكون وحدى ليوم معلوم

# صدى العمر