أعياد آذار ( مارس)
إجا آذار ياإمّي
وع شبّاكي ترنّح العصفور
شفايفي ضحكتلو ياإمّي
وقلبي من الوجع مقهور
بدمع عيونو همس وقلّي :
أنا متلك جناحي مكسور
بالحبّ وصّيتينا ياإمّي
وقلبي للوفا منذور
***********
إجا الرّبيع ياإمّي
مرّت الأيّام ..
وبعدها صورتك ..
بخيالي عم تجول
كلّ الأوطان لقلبي كنتِ
وبكلّ الفصول
واليوم بغيابك ..
آذار حضن الكون
ووحدي حاضنّي كانون
**********
أعياد وأفراح ياإمّي
وأنا ووطني ..
مجروح ومغدور
بعيد المعلّم..
نسيت الحروف
وماظل غير اسمك بين السطور
وبعيد المرأة لأجلك ..
شو كان كثيف هطل العطور
************
بعيد الأمّ ياإمّي
إحساس اليتيم حسّيت
وقتلت الدّمع بسكّين السكوت
وشو تمنّيت بهالعمر ياإمّي
بحضنك طفل صغير ظل
وتبقى إيديكي مرجوحتي
ليوم النّشور .
باسمة العوام / سورية
ليست هناك تعليقات:
إرسال تعليق