تصدّق بإيه
..........
تصدّق بإيه
أنا زارني طيفك في منامي
وجريت عليه
كان جاي عليَّ خدته بإيديّ
خدني بإيديه
والشوق رماني بأحضانه
وسقاني من نبع حنانه
وغرقت في الحب عشانه
سلمت قلبي وروحي إليه
...
عزّ المنام كان موعدنا
شهد الغرام كان موردنا
شوق الوصال من غير محال
يجمع قلوبنا ويسعدنا
،
أحلى الكلام وتكلمنا
لغة العيون دارت بينَّا
ده كلام كتير كان لُهْ معنى
واحنا اللي نفهم معانيها
ولا حد عنّا بيسمعها
واحنا اللي برضك نداريها
كان أحلى طيف بيهنيني
طيفك يا حياتي يا نور عيني
....
ريَّحلي قلبي وهنَّاني
ويقول يا روحي يا وحشاني
وياخدني مرَّة بأحضانه
وانا آخده مرَّه بأحضاني
،
أحلامي وعدَّت في دقيقة
ويا ريت الرِّؤياااا دي حقيقة
وافضل على طول أنا صاحيالك
في نهاري وليلي أنا أقبالك
من غير متقول تؤمر وتنول
ابسط يا حبيبي هنيالك
....
ودَّعني طيفك في معاده
من بعد ما أدِّيتله مراده
طيَّر منامي من عنيَّ
كَرَّهني في الليل وسهاده
،
ودَّعني بعد ما هنَّاني
ودَّعني سابني ف أشجاني
وأتاري بعد الفرقة جراح
بترجع الأحزان تاني
....
الناس بتشكي هموم الليل
وانا كنت في الليل بتهنَّى
كان طيف حبيبي طبعه أصيل
خلَّاني أطلب واتمنى
،
يا ريته دام طيفك عندي
ويا ريت تقوللو ارجع تاني
دُقت بفراقه نار وجدي
بكَّاني بَعْد ما هنَّاني
...................
بقلمي :
الشاعر منصور اللوح
غزة ــ فلسطين
ليست هناك تعليقات:
إرسال تعليق